حن قلبى لأيام وكانت … من زمن الحب الجميل
زمان وعدى وراحت حلاوته .. كان كل معنى فيه أصيل
والله احنا فى زمن العجايب
الصديق كان خل وافي … كلمته تطيب وتشفي
ملاك وقلبه صافي ودافي … لمسة محبة من ايده تشفي
فينك يا خلي فى زمن العجايب .. لا عاد صحاب ولا عاد حبايب
والله احنا فى زمن العجايب
وفينك يا خويا يا ابن ابويا وامي .. ياللي شلت عني همي
كنت جنبي حته مني .. مرسى بحري همسي وسري
فرقتنا كتير المصالح .. ايد بتسلم وعيون بتتلاقى
وقلبك بعيد يا خويا عن حضني
والله احنا فى زمن العجايب
وفينك يا جاري … ياللي كنت أقرب من أهلي وناسي
ببتسامه تفوت تمسي … وصباحك نادي وسكر
والكلمة منك ورد معطر … سيرة محبة وعشرة أصيلة
راحت معانى الجيرة الجميلة
والله احنا فى زمن العجايب
نفوسنا كانت صفا وسماحة … وديارنا كانت بالحب واحة
الأنس كان صفو الأحبة .. وكنا للغريب فرشة وراحة
ليه النهارده جوانا خوف .. والأمان هجر قلوبنا
والغدر أصبح عالمكشوف … والوهم ليه سكن عقولنا
ليه كل يوم علينا يفوت .. أجمل ما فينا يموت
والله احنا فى زمن العجايب
كنا فى طريقنا بنرمي السلام … والكل كان لينا حبيب
فى الشوارع .. فى الحارات … الكل كان من قلوبنا قريب
عيون طيبة تسعد صباحك … تدعيلك ولو كنت عنها غريب
والله احنا فى زمن العجايب
مش بس المحبة هيه اللي غابت .. دي الشهامة والكرامة
وعزة الإنسان ياخسارة راحت
أب قاسي وأبن جاحد … والأنسانية جوانا ماتت
أبسط حقوق الإنسان .. فى زحمة الطغيان
يا خسارة ضاعت وتاهت
وفين نلقى الرحمة والشفقة … وفين نلقى الصدق والإخلاص
بعد ما نور الدين انعدم … من قلوب بعض الناس
صحيح بنشوفهم بني أدميين .. لكن معدومين الشعور والأحساس
والله احنا فى زمن العجايب
وليه نلوم على الأيام … ونعتب عليك يا زمان
لا فى يوم غابت شمسنا … ولا فى يوم بطلت الأرض دوارن
ولا الشجر يوم غير خضاره … ولا الصبر أصبح ريحان
والنجمه لسه مزينة الليالي … والقمر طول عمره سهران
كل اللي اتغير انت … ياللي كان أسمك إنسان
وفين انت يا إنسان … دورت عليك فى كل مكان
لقيتك سراب إنسان … ضاعت ملامحك
زادت جراحك … لقيتك خالي من الروح والوجدان
والإنسان .. يعني الأمان .. يعني الحب .. يعني الحنان
يعني الشفقة والرحمة … والعدل والتقوى والإيمان
لابس بفخر توب الخطية.. فارد جناح من الظلم والطغيان
وفى الحقيقة انك ضعيف .. أصغر من أن يكون لك كيان
والله أحنا فى زمن العجايب